الإعلام والسياسيه...واللعب بكرامتنا!!!
من مده كبيره شويه وأنا ساعات بسأل نفسي ياترى التاريخ حيكتب عننا ايه.. عن جيلنا وعن الأحداث العامه المصاحبه للفتره اللي إحنا عايشينها,يعني بعد حوالي 100 سنه كده وفي كتب التاريخ في الدراسه حيتكتب عننا ايه.. زي ما كنا بندرس كده عن الحمله الفرنسيه وأحمد عرابي وسعد زغلول ومصطفى كامل,والشكل العام للفترات اللي كانوا فيها,إحنا بقى الفتره اللي إحنا فيها بقى حيسموها ايه وحيقولوا عنها ايه؟؟
يعني كلام من نوعية "وكانت مصر والوطن العربي يمر بحاله من الفساد والظلم والتخلف الجهل وكان الشعب يتسم بالسلبيه واللامبالاه"
وبعد كده تذكر الأحداث المميزه زي الإنتفاضه في فلسطين.. التزوير في الإنتخابات.. وضع النقابات تحت الحراسه.. بناء الجدار العازل..تخاذل الأمه العربيه والتفكك العربي والحرب على العراق
ويتكتب إنه في مارس 2010 أعلنت إسرائيل ضم الحرم الإبراهيمي ومسجد بلال بن رباح للتراث الإسرائيلي وسط صمت وتخاذل وسلبيه مقززه من مصر والشعب العربي حتى من غير تهديد بطرد السفير الإسرائيلي
الكلام دا مش بس عن الحكومات دا كمان عن الشعوب والإعلام ,نفس الشعب والإعلام اللي ساعة ماتش مصر والجزائر كانوا قالبين الدنيا علشان يا حرام كام واحد إتجرح من شوية متعصبين كره... نفس الشعب اللي بهدل الدنيا عند سفارة الجزائر بمصر في الزمالك وكانوا عاملين مظاهرات علشان حاسين بالإهانه من الجزائر..نفس الشعب اللي شتموا الجزائر وعملوا عليهم صور سيئه وحرقوا العلم الجزائري..نفس الشعب اللي قالوا لو الجزائر وإسرائيل لعبوا ماتش حنشجع إسرائيل ...هو هو نفس الشعب اللي طالب بطرد السفير الجزائري من مصر علشان حتة ماتش كره بدعوى إن كرامتنا إتهانت وإننا سكتنا كتير وبعد كده مش حنسمح لحد يهيننا ولا يجرح كرامتنا
يااااه...فين الناس دي دلوقتي وفين كرامتهم وفين كرامة مصر,ولا إحنا كرامتنا بنحس بيها بس ساعات بمزاجنا لما يكون السبب تافه وخلاف بيينا وبين بعض... وبننساها لما يكون في إنتهاك للمقدسات وعدم إحترام للأمه الإسلاميه كلها وناس مسلمين بيموتوا من غير ذنب غير إنهم بيحبوا بلدهم ونفسهم يعيشوا في بيتهم زي الناس ولما طبعاً يكون اللي بيهننا عدونا
اللي عنده كرامه عنده كرامه على طول واللي معندوش بيقول أي كلام في أي وقت علشان يثبت لنفسه وللي حواليه إنه لسه عنده كرامه
اللي عنده كرامه عارف إمتى يحس بالإهانه وإمتى ياخد موقف... واللي معندوش بيحس بكرامته لما الإعلام والحكومه تقولوا خد بالك لازم تضايق علشان دي كرامتك وكرامة مصر وساعتها بس يقولهم حاضر ويقول أه دا أنا عندي كرامه ولازم أخد موقف
بقول للناس اللي قالت نطرد السفير الجزائري من مصر ساعة الماتش...رأيكم ايه في ضم الحرم الإبراهيمي ومسجد بلال بن رباح للتراث الإسرائيلي..حاسين بايه ولا مش حاسين بحاجه!!!
وأي الموقفين أشد ألم وإهانه؟؟؟
ولا حنقول دي حاجه في فلسطين وملناش دعوه بيها!!!
ياترى حنقول لربنا ايه يوم القيامه لما يسألنا عملتوا ايه لما عرفتوا إن حرماتي بتنتهك وأخوك المسلم بيتظلم وبيتهان وبيتقتل؟؟؟
مبقلش يللا نحارب...علشان إحنا أضعف من إننا نطالب بدا,بس كان نفسي أشوف الناس والإعلاميين اللي كان دمهم محروق جداً ومتحمسين بيتكلموا عن المهزله والظلم اللي إسرائيل بتعمله دلوقتي ولو حتى بنصف الحماس اللي كانوا بيتكلموا بيه ساعة موضوع مصر والجزائر
كان نفسي أشوف علم إسرائيل وهو عليه علامة غلط زي ما أتعمل في علم الجزائر
إكتب يا تاريخ إننا كنا شعب سلبي ومغيب وجبان وماشين ورا الإعلام الغير شريف والحكومه والمسئولين الجبناء...إكتب يا تاريخ إننا شوفنا كتير وسكتنا و لسه حنشوف وحنسكت...إكتب إننا كنا مش بنقرا التاريخ ولا بنتعظ منه
إكتب يا تاريخ ودايماً قول إن كل بلاد العرب أوطاني
يــــــــــــــــــــارب لا تحاسبنا بما فعل السفهاء منا
بلاد العرب أوطاني
http://www.youtube.com/watch?v=VJd4uDBV6P0
ملحوظه:في حاجات كتير أهم من إنك تشجع مصر في ماتش كره
