السلام عيلكم ورحمة الله وبركاته
مبروك لمصر ولكل المصريين
الفوز بكأس أفريقيا
الحمد لله,ربنا كريم وعايز يفرحنا ويفرح دول عربية كتير معانا
لكن وفي وسط الفرحة دي كلها
كان ليا ملحوظة لاحظتها
في كلامنا اللي بنردده, دخلتني في سكة مش عارفة بعيدة شوية ولا ايه
بس حبيت أشارككم تفكيري
صورة 1
مصر بتلعب
مبروك لمصر
مصر كسبت
مصر جابت الكاس
ومصر أخدت الكاس
دي كلها كلمات بنسمعنها منن ألسنة مصرية رجالة وستات...شباب وبنات
لما المنتخب المصري يكسب في أي بطولة
وكإن مصر قامت من شمال أفريقيا ببحرها المتوسط وبحرها الاحمر وشريط النيل الممتد بطولها
وأهراماتها وبيحرصهم أبو الهول وإتنقلت لإستاد غانا ولعبت ماتش كرة وتعبت وجريت وعرقت
وجابت جول وأخدت الكاس ورجعت
صورة 2
دي بلد تقرف يا أخي
دا أنا نفسي أسيبها النهاردة قبل بكرة
مصر دي جوعتنا
وكإن مصر برضه بنيلها وأرضها وخيرها طمعانه ومستخسرة لقمة العيش والعيشة الكريمة لشعبها
مع إن مصر لا هي اللي راحت جابت الكاس
ولا هي اللي بخيلة على شعبها ومحوشة خيرها لغيرها مثلاً
اللي جاب الكاس كانوا شباب مصري عندهم ضمير ودين وإصرار وإرداة وبذلوا قصارى جهدهم
وفي الأخر إتنسب الفوز لمصر كلها
واللي معطل وظالم الشعب وبيسرقهم وبيسرق خيرهم وينكد عليهم
الناس اللي معندهاش ضمير ولا أخلاق ولا دين
وفي الأخر برضه إتنسب الظلم لمصر
وهي ساكتة ,مظلومة و بتتفرج وساكتة
منتظرة الخير ينتصر على الشر
و ولادها يحسوا بيها ويحبوها ويعرفوا قيمتها
وفي وقت الفرح وفي وقت الحزن برضه يحبوها ويكون عندهم أمل وثقة في نفسهم إنهم يقدروا يبنوها
مفيش أسوء من الظلم واليأس
ومفيش أحسن من إنك تحب بلدك في كل الأقات والأوضاع
فقيرة أو غنية
كسبت أو خسرت
قاسيت فيها أو إرتحت
لإن مهما كان بلدنا ليها فضل علينا بعد ربنا
والسلام عليكم
ليست هناك تعليقات:
إرسال تعليق